Landsgemeinde
Sin il mir davos represchenta il fresco d’Albert Welti e Wilhelm Balmer in cumin. Questa furma da radunanza populara ch’exista anc adina en tschertas regiuns, è l’antecessura da la democrazia directa moderna.
Il lampadari
Il lampadari da fier battì che penda sur la maisa centrala paisa 1,5 tonnas ed ha 208 pairs.
La sala dal Cussegl dals chantuns
Il stil da la renaschientscha reunescha divers materials vegls (lain, marmel stgir) en la sala dal Cussegl dals chantuns. Cun quai regorda ella cun sia atmosfera paschaivla a bleras salas communalas e salas dals parlaments chantunals. La sala dal Cussegl naziunal è totalmain differenta, pli clera, ma era pli canerusa.
Sutga dal president
Il president maina las debattas dal cussegl, fixescha la glista da tractandas da las sesidas, maina il biro dal cussegl e represchenta il cussegl vers anora. Il president ed ils dus vicepresidents furman il collegi presidial.
La sala dal Cussegl dals chantuns
Il Cussegl dals chantuns vegn era numnà la “chombra pitschna” dal parlament. Quella represchenta ils chantuns, il Cussegl naziunal – u la “chombra gronda” – percunter represchenta il pievel. Il Cussegl dals chantuns sa cumpona da 46 deputads, adina dus per chantun cun excepziun dals vegls mezs chantuns che han mo in represchentant. L’elecziun dals deputads dal Cussegl dals chantuns ha lieu mintga quatter onns. La procedura electorala vegn fixada dal dretg chantunal. Cun excepziun dal chantun dal Giura (elecziun da proporz), vegnan ils cussegliers dals chantuns elegids cun elecziuns da maiorz.
Vuschà
Vuschà vegn cun auzar il maun. Il dumbravuschs e ses suppleant han l’incumbensa da quintar las vuschs e da communitgar ils resultats al president che als annunzia a l’assamblea.
Tribunas
Tant las radunanzas dal Cussegl naziunal sco era las radunanzas dal Cussegl dals chantuns èn publicas.
