TOUR |
La halla d’entradaDavos il portal s’avra ina pitschna halla d’entrada vers las stgalas principalas. Davant las duas pitgas che portan il tschiel sura da la halla d’entrada stattan dus urs da bronz. Sco simbols da la chapitala federala salidan els ils visitaders tegnend cun lur tschattas in scut cun la vopna da la Confederaziun. 
La cupla da vaiderEn il center da la cupla è enchastrada la crusch svizra, circumdada da las vopnas dals 22 emprims chantuns. Il mosaic è arranschà a moda ch’ils chantuns sa drizzan vers il Stadi federal. Quest purtret simbolisescha il sistem politic svizzer, uschia sco quai ch’el vegn proclamà en l’inscripziun “Unus pro omnibus, omnes pro uno”. 
Ils trais ConfederadsQuest monument imposant represchenta ils trais legendars babs fundaturs da la veglia Confederaziun, Werner Stauffacher, Walter Fürst ed Arnold von Melchtal. Els han fatg lur engirament l’onn 1291 sin il prà mitic dal Rütli a la riva dal Lai dals Quatter Chantuns. 
Nicolas da FlüeL’eremit Nicolas da Flüe (1417-1487) è la persunificaziun dal spiert da cumpromiss e da la tenuta pacifistica che caracterisescha la Svizra. El è vegnì enconuschent, perquai ch’el era abel da conciliar ils Confederads a Stans l’onn 1481. El è vegnì declerà sontg l’onn 1947. 
Arnold WinkelriedL’erox legendar Winkelried ha sacrifitgà si’atgna vita e permess uschia als Confederads da gudagnar la battaglia da Sempach cunter ils Austriacs l’onn 1386. El simbolisescha la devoziun e la solidaritad.
Ils quatter mercenarisIls mercenaris simboliseschan las quatter linguas naziunalas. Da sanestra a dretga ils mercenaris da las suandantas linguas: talian, tudestg, rumantsch e franzos. 
Crusch svizraIls 12 da settember 1848 ha il parlament decretà la nova Constituziun federala, suenter che questa era vegnida approvada da quindesch e mez chantuns da ventgadus. L’october 1848 han il pievel ed ils parlaments chantunals elegì il Cussegl naziunal ed il Cussegl dals chantuns, ils quals èn sa reunids il november 1848 per eleger ils emprims set cussegliers federals. 
|