L’entrada

Il portal d’entrada è flancà da duas statuas da Maurice Hippolyte Reymond: ils dus umens che sesan represchentan l’”istoricher” da maun sanester ed il “cronist” da maun dretg. Quels valiteschan la lavur dal parlament cun l’egliada dals contemporans e la distanza da l’istorgia. L’inscripziun “Curia Confoederationis Helveticae” sa referescha al senat roman.

Helvezia

Sin la culmaina da la fatschada dal nord stat ina gruppa da statuas allegoricas da Rodo von Niederhäusern. Questas statuas represchentan la Helvezia, che simbolisescha l’independenza politica da la Svizra, flancada da maun sanester da la legislativa, da maun dretg da l’executiva.

Cupla

Il Palaz federal vegn dominà dad ina cupla cun 22 fanestras che regordan als 22 chantuns (senza il Giura). Oriundamain ha ina glisch a l’intern transfurmà la cupla en ina laterna immensa che avess stuì purtar sia glisch a tut las quatter parts dal pajais. Il Palaz federal è davaira il cor da la Svizra, il “far” dal pievel e dals chantuns. Ils ornaments da la cupla e la crusch svizra sisum straglischan puspè en tutta parada suenter la renovaziun recenta.

Vaiders da la sala dal Cussegl dals chantuns

Il Cussegl dals chantuns represchenta cun sias 46 sedias ils chantuns. Mintgin dals 20 chantuns ha duas sedias ed ils vegls mezs chantuns han ina sedia (Sursilvania, Sutsilvania, Basilea-Citad e Basilea-Champagna, Appenzell Dadora ed Appenzell Dadens). Uschia elegia era il chantun da Turitg, che ha in milliun abitants, dus cussegliers dals chantuns, exact tuttina sco il chantun Uri che n’ha gnanc 35’000 abitants.

Fatschada dal sid La halla d’entrada Vart dal sid da la cupla Entrada per ils visitaders Entrada per ils visitaders