Vardad
Quest emprim purtret da la seria deditgada a la virtid mussa ina dunna che lascha crudar il vel e la mascra. Ella è il simbol da las decisiuns da l’autoritad che duain esser cleras.
Sabientscha
Ina dunna cun ina curuna d’arbajas sesa sin in tron, en ses mauns dus enorms ordinaturs. Ella regorda ils deputads che la lavur dals antecessurs na dastga mai vegnir emblidada.
Patriotissem
In anghel porta ina bandiera svizra e trais pitschnas amurettas represchentan las festas federalas tradiziunalas (chant, gimnastica e tir). Grazia a questas festas naziunalas è la crusch svizra daventada il simbol da la naziun.
Fortuna
Sin quest purtret tegna ina dunna circumdada da papavers e da radis da sulegl in corn da l’abundanza emplenì cun fritgs e flurs ed ina frastga d’uliver, il simbol da la pasch. Ella regorda a la bainstanza ch’il Stadi federal sto procurar per ses burgais.
Charitad
Quest fresco mussa ina dunna circumdada da morts che sesa sin ruinas. In blessà sa tegna vi d’ina bandiera da la crusch cotschna, il simbol per la charitad.
Giustia
Ina dunna che sesa en ils nivels porta ils simbols da la giustia en ses mauns: la stadaira ma era la spada che parta a moda gista.
Sala dals pass pers
Durant las sessiuns è la sala dals pass pers il lieu d’inscunter dals parlamentaris, dals lobists e dals schurnalists.
